جمعه مباركه

اليوم الجمعه ، يوم خير ان شاء الله على الوطن .

1 . قبل صلاة الجمعه، او فجراً والصباح الباكر الناس تقضي حوايجها من سوق الخضار (الشبرة)، الخس موجود ، بس لرويد جديم، وسلطات هل بوظبي بدون لرويد ماتضبط ،  وبعد الانتهاء من الشبرة يأتي دور سوق السمك، يا الله زحمة اهنود ، اقصد بياعي السمك هنود، طيب الاسماك مختلفة الانواع، الهامور، الشعري، الجش، الكنعد، الصافي المحلي اما الصافي صنيفي غير متوفر، ولصبيطي بعد هب موجود، البساسير رخيصه، بس انا عندي توصيه من الشواب والعيايز، خاطرهم  بالبدح ، اقول في خاطري وين بالقاج يابديحه، على اي دكه وعند اي هندي؟، كلما سألت يقال هذا سمك ممنوع، ليش ممنوع ؟هذا مخدرات؟!، يرد الهندي حكومة مال ابوظبي وبلديه وكلو نفرات مني مني تفتيش، يا هذه مشكلة موسم البدح وممنوع؟!، وينك يالموبايل لنتصل للوالده، الو الو الوالده؟ يالوالده البدح منعوه،  واااايه شعنه يمنعونه؟!! ردت الوالده،  البلديه منعته تباه يتكاثر،  فضل عنهم، ماحد يباه،  هذيلا غربتيه ميعرفوله،  البدح تارس البحر،  هذيلا مايخافون الله،  نحن مانبا حبوله نبا البدح في وقته،  يازينه مشواي.جان ماشي بدح هات غابط للشواب وجش وزريدي  للفروخ (الاطفال)، وغنت اغنيه عفويه ، اشراع محمل ابويه ابيض،،،، ابيض شرا القرطاس، انشاء الله يالوالده باييب لي فيه الخير، بس الاسعار ارتفعت بسبب منع البدح، يعني نسب سعريه خرجت دون وجه حق، يا لله كله ماشي ، اهم شيء نرضي الاهل ونغديهم ونسمع سوالفهم، يا لله يا رفيق بسرعه لتفوتنا صلاة الجمعه.

بن مهاه